Máis de 7000 rapaces de centros de toda Galicia por onde pasan as diferentes vías do Camiño gozan nesta terceira edición de actividades plásticas e audiovisuais
Escolares dos centros de ensino do concello de Pontevedra continuarán esta semana gozando nas sesións de actividades plásticas e audiovisuais da campaña Os contos do Camiño, organizada polo S. A. de Xestión do Plan Xacobeo en colaboración con OQO editora, con obradoiros conducidos por Raquel Méndez e Eva Vila.
As actividades da terceira edición de Os contos do Camiño botaron a andar en xaneiro en centros das catro provincias e continuarán este mes en Pontevedra. Tras desenvolverse a semana pasada nos CEIP de Froebel, Parada-Campañó, Campolongo, San Benito Lérez, A Carballeira, Manuel Vidal Portela e Príncipe Felipe e no EEI dos Campos, agora tócalle aos CEIP de San Martiño, e Santo André de Xeve, EEI de Verdecido, CEIP de Marcón, CEIP de Cabanas e CEP A Xunqueira II.
Martes 10
CEIP San Martiño
12 horas Unha sesión
CEIP Santo André de Xeve
11.45 horas Unha sesión
Mércores 11
EEI de Verdecido
12 horas Unha sesión
CEIP de Marcón
12.45 horas Unha sesión
Xoves 12
CEIP de Cabanas
12.30 horas Unha sesión
Venres 13
CEP A Xunqueira II
12.30 horas Unha sesión
As dúas anteriores campañas de Os contos do Camiño xa tiveran unha excelente acollida por parte dos 10 000 nenos e nenas participantes. E, grazas a elas souberon un pouco máis da importancia do Camiño de Santiago na transmisión oral da cultura e do patrimonio inmaterial de diferentes pobos do mundo.
Con todo, 70 centros de ensino público de localidades situadas nas distintas rutas xacobeas terán tamén a oportunidade de compartir esta experiencia. Deste xeito, máis de 7000 rapaces de educación infantil (5 anos de idade) e de 1º e 2º de primaria descubrirán a través de sesións que mesturan narración oral e audiovisual como os peregrinos, no seu camiñar, traen canda eles a lingua e a cultura dos seus lugares de orixe.
OQO editora nas sesións coas escolas empregará os contos populares de distintos países como fío condutor. Os relatos narrados, a música e as imaxes permitiranlles aos máis pequenos peregrinaren polas distintas rutas xacobeas e afondaren asemade nos valores da convivencia entre culturas.
Para pecharen a actividade, os nenos e as nenas elaborarán oito cadernos un por cada Ruta Xacobea nos que deixarán a súa pegada, como recordo por participaren nesta viaxe colectiva. Ao longo das sesións, irá tomando forma un camiño cada vez máis grande que, ao final da edición, se exporán.