Os talleres de OQO facilítanlles aos cativos coñecer a cultura doutros países a través dos seus contos e a súa gastronomía
As actividades abriron o apetito e a mente de nenos e nenas de Marrocos (Marrakech, Tetuán, Rabat e Casablanca), Italia (Palermo) e Polonia (Varsovia)
Sydney, Canberra, Melbourne e Adelaida son os novos destinos destes obradoiros da editorial para o Instituto Cervantes
Alimentar ben corpo e intelecto desde idades temperás. Gastronomía e lectura van collidas da man nos obradoiros que OQO editora realiza para o Instituto Cervantes co obxecto de que os máis pequenos coñezan dun xeito divertido (e tamén saboroso!) a cultura doutros países.
Trala exitosa experiencia en Rabat, Marrakech, Tetuán e Casablanca (Marrocos), Palermo (Italia) e Varsovia-Polonia, OQO editora recolle os seus útiles de cociña e trasládase a Sydney, Canberra, Melbourne e Adelaida – Australia (do 30 de maio ao 8 de xuño), onde os nenos e as nenas terán a oportunidade de coñecer a cultura doutros lugares do planeta mergullándose nos seus contos e degustando a súa gastronomía: un novo xeito de viaxar, sentir, ulir, gustar, ver, escoitar e coñecer.
Esta viaxe gastronómica parte dos contos de OQO editora: Sopa de nada e A sopa queima nos que a través dunha actividade se detallan ingredientes que compoñen a sopa.
Desde os contos e a sopa, os pequenos descubrirán os gustos gastronómicos de diferentes países. Indagando nos seus pratos típicos, os rapaces inventarán novas receitas cos ingredientes característicos da cociña de cada país.
Deste xeito, confeccionarán e comerán unha sobremesa moi especial. Cada cativo (cociñeiro-viaxeiro) recibirá un receitario dos lugares visitados nesta viaxe gastronómica-literaria para realizar en familia.
O periplo tamén incluirá sopas de letras, recomendacións literarias e un glosario de termos culinarios para empachar coa cultura e engordar o intelecto.
OBRADOIROS GASTRONÓMICO-LITERARIOS NAS ESCOLAS.
SYDNEY:
30 DE MAIO
KU-RING-GAI CREATIVE ARTS HIGH
CASTLE COVE PUBLIC SCHOOL
31 DE MAIO
MARRICKVILLE WEST PRIMARY SCHOOL
1 DE XUÑO
MACGREGOR PRIMARY SCHOOL
MELBOURNE:
4 DE XUÑO. BERWICK PRIMARY SCHOOL
5 DE XUÑO. ASCOT VALE WEST -REGENCY PARK
6 DE XUÑO. POINT LONSDALE
2.CONFERENCIA SOBRE O ÁLBUM ILUSTRADO NA AULA.
SYDNEY:
1 DE XUÑO. CENTRO DE RECURSOS DE PROFESORES
MELBOURNE:
2 DE XUÑO. ASOCIACIÓN DE MESTRES DE LINGUA ESPAÑOLA EN AUSTRALIA
3.CONFERENCIA SOBRE O ÁLBUM ILUSTRADO E O CINE.
ADELAIDA:
7 DE XUÑO. Alumnos de Bacharelato
8 DE XUÑO. ADELAIDE HIGH . Alumnos de Bacharelato