O escritor Xavier Queipo (Santiago de Compostela, 1957) presentará o vindeiro martes 29 de decembro na Libraría Couceiro o seu último traballo, A illa dos cangrexos violinistas, álbum ilustrado por Jesús Cisneros.
A illa dos cangrexos violinistas, publicado tamén en castelán, é a primeira colaboración de Xavier Queipo con OQO editora. A obra atópase na Colección Q, dirixida aos lectores de entre 8 e 12 anos .
Xavier Queipo aborda nesta historia como a sabedoría dos maiores é tan importante como a ansia e o desexo de aprender dos máis cativos. Moi, a protagonista de A illa dos cangrexos violinistas, pretende saber máis sobre estes tímidos crustáceos e non cederá no seu empeño ata acadalo.
Con este álbum, Xavier Queipo lémbranos que sempre hai cousas novas que saber, que un pode aprender ben por si mesmo ou ben dos que saben máis, como o avós, que gardan auténticos tesouros de sabedoría.
Un fermoso álbum que nace da ansia de coñecemento, moi viva sempre nos nenos, e que nunca deberían deixar morrer tampouco os adultos.
LUGAR: Libraría Couceiro
Praza de Cervantes, 6
Santiago de Compostela
DÍA: 29/12/2009
HORA: 20.00 Horas