A serie de animación audiovisual “Caracois” de OQO filmes, no Salón de lecer Infantil e Xuvenil “Xuvenlugo”
Nenos e nenas de 2 a 4 anos gozaron da serie de animación audiovisual Caracois, de OQO filmes, que foi proxectada esta fin de semana na xornada de portas abertas de Xuvenlugo, Salón de lecer infantil e xunvenil organizado pola fundación Feiras e Pazos coa colaboración da Área de Cultura da Vicepresidencia primeira da Deputación de Lugo.
Xuvenlugo botou andar o 4 de decembro, abrindo todas as fins de semana, e a partires do 23 de decembro e ata o 9 de xaneiro abrirá todos os días a partires das 16:30 horas no recinto do Pazo de Feiras e Congresos de Lugo.
Caracois consta de 26 capítulos de seis minutos de duración cada un, feitos en Galicia e en galego, grazas a colaboración da Vicepresidencia Primeira da Deputación de Lugo.
Esta serie, realizada coa técnica de stop-motion, está dirixida a un público infantil de idade entre 2 a 4 anos. Os capítulos están baseados nas historias dos álbums de Caracois, cinco libriños de nanOQOs, colección de OQO editora en cartón duro e pequeno formato destinada aos prelectores.
En Caracois visualízase un mundo de relacións infantís desde a perspectiva duns animaliños de xardín. Son a súa forma de vida, as súas relacións, os seus xogos, os seus conflitos, as súas aventuras, a través duns protagonistas cunha psicoloxía predeterminada e precisa, e que encarnan así mesmo tipos, os que tecen este mundo complexo e interrelacionado.
Aínda que a función de entreter é primordial, cabe na serie un compoñente ‘didáctico’ que axude ao neno a ver dunha forma inconsciente condutas que comportan valores éticos e cidadáns fundamentais.
O traballo, a solidariedade, a amizade, o amor, a arte nas súas múltiples facetas (música, danza, teatro, etc…), o xogo como aventura e procura, por unha banda; e os perigos, os medos, os sustos, por outro, conforman un universo complexo de múltiples interaccións das que sempre se obterá aprendizaxe e diversión.
Desde a fidelidade ao proxecto editorial de OQO editora, OQO filmes adapta os álbums ilustrados ao formato audiovisual a través da animación en stop-motion: historias de calidade que desde a tradición oral van encontrando diferentes soportes texto, imaxes, audiovisual ante a necesidade de ser contadas, escoitadas e transmitidas.
O imaxinario infantil durante tanto tempo construído pola literatura tanto oral como escrita, atopa nesta proposta un novo soporte sobre o que seguir tecendo elementos de fascinación ante a mirada do pequeno espectador; elementos que explican o mundo e canalizan pulsións dos universos imaxinados por medio dun libro e, agora tamén, a través de personaxes en movemento. Outro xeito de reconstituír o camiño clásico de achegarse aos contos.
Trátase dunha aposta polo entretemento de calidade para a infancia e en galego. Así o demostra o feito de que o mexicano Luis Téllez, profesional internacional de prestixio recoñecido con diferentes galardóns, sexa o director da mesma. En definitiva, a serie conta 26 boas historias a través dunha proposta plástica innovadora e unha música orixinal.